អំពី គម្រោងPAFF

ការពង្រឹងសមត្ថភាព និងបង្កើនហិរញ្ញវត្ថុសម្រាប់ការគ្រប់គ្រងធនធានធម្មជាតិនៅតាមសហគមន៍

កម្មវិធីភាពដៃគូលើវិស័យព្រៃឈើ និងជលផល នៅប្រទេសកម្ពុជា (PaFF) កំពុងតែជួយដល់ប្រជាជនកម្ពុជានៅតាមទីជនបទ អនុវត្តសិទ្ធិរបស់ពួកគេក្នុងការគ្រប់គ្រង ការពារ និង ទទួលបានប្រយោជន៍ពីធនធានធម្មជាតិនៅមូលដ្ឋានរបស់ពួកគេ ដើម្បី ទ្រទ្រង់ជីវភាពរស់នៅ កាត់បន្ថយភាពក្រីក្រ និងបង្កើនភាពធន់នឹងវិបត្តិផ្នែកសេដ្ឋកិច្ច និងបរិស្ថាន។ PaFF ក៏ព្យាយាមពង្រឹងដំណើរការប្រជាធិបតេយ្យ លើកកម្ពស់នីតិរដ្ឋ និងការពារសិទ្ធិស្រ្តី ក្រុមជនជាតិដើមភាគតិច និងសមាជិកសហគមន៍ដែលមានប្រាក់ចំណូលទាបតាមរយៈការចូលរួមរបស់ពួកគេនៅក្នុងការគ្រប់គ្រងធនធានធម្មជាតិនៅតាមសហគមន៍។

PaFF ផ្តោតលើការកសាងសមត្ថភាពដល់សហគមន៍ អាជ្ញាធរមូលដ្ឋាន និងមន្រ្តីរដ្ឋាភិបាល ដើម្បីចូលរួមគ្រប់គ្រងធនធានធម្មជាតិប្រកបដោយចីរភាពតាមរយៈយន្តការគ្រប់គ្រងធនធានធម្មជាតិដោយសហគមន៍ ដែលមាន សហគមន៍ព្រៃឈើ សហគមន៍នេសាទ និងសហគមន៍តំបន់ការពារធម្មជាតិ។ កម្មវិធីបានជួយសហគមន៍មូលដ្ឋាន និងជនជាតិដើមភាគតិច ឲ្យទទួលបាននូវសិទ្ធិស្របច្បាប់លើការគ្រប់គ្រងធនធានព្រៃឈើ និងជលផល ការអនុវត្តផែនការគ្រប់គ្រងធនធាន ការបង្កើនផលិតកម្ម និងការទទួលបាននូវហិរញ្ញប្បទាន។ ការផ្តួចផ្តើមនេះ ក៏ផ្តោតសំខាន់ លើការជួយស្រ្តី និងជនជាតិដើមភាគតិច ឲ្យបានចូលរួមកិច្ចពិភាក្សាជាមួយអជ្ញាធរ លើការគ្រប់គ្រងធនធាន ការរៀបចំផែនការ និងគោលនយោបាយនានា។

ដើម្បីបង្កើនចំណូល PaFF គាំទ្រដល់ការបង្កើតសហគ្រាសសហគមន៍ខ្នាតតូច ក្នុងការកែច្នៃត្រី អភិវឌ្ឍន៍ និងបង្កើតទីផ្សារសម្រាប់អនុផលព្រៃឈើដូចជា ទឹកឃ្មុំ និងឬស្សី និងការផ្សព្វផ្សាយអេកូទេសចរណ៍។ PaFF ពង្រឹងការផ្សាភ្ជាប់រវាងនឹងសហគមន៍ និងវិស័យឯកជនក្នុងខ្សែចង្វាក់ផលិតកម្ម។

PaFF ក៏បានបង្កើតឥណទានសហគមន៍ និងបរធនខ្នាតតូច សម្រាប់ជាប្រភពហិរញ្ញប្បទានដែលមានចីរភាពមួយក្នុងការអនុវត្តផែនការគ្រប់គ្រងព្រៃឈើ និងជលផល ខណៈដែលអាចប្រើប្រាស់ ជាមធ្យោបាយមួយសម្រាប់សហគមន៍ខ្ចីយកទៅបណ្តាក់ទុនសម្រាប់បង្កើនជីវភាពរបស់ពួកគេ។

ជារួម PaFF នឹងផ្តល់ប្រយោជន៍ដល់ប្រជាជនកម្ពុជានៅជនបទរាប់ម៉ឺននាក់ ស្របតាមគោលដៅដាក់ចុះក្នុងគោលនយោបាយរបស់រាជរដ្ឋាភិបាលកម្ពុជា រួមមានការប្តេជ្ញាចិត្តអន្តរជាតិចំពោះការប្រែប្រួលអាកាសធាតុ និងជីវចម្រុះ និង វឌ្ឍនភាពឆ្ពោះទៅសម្រេចគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិផងដែរ។

ទីភ្នាក់ងារ សម្រាប់ការអភិវឌ្ឍ និងកិច្ចសហប្រតិបត្តិការ ប្រទេសស្វីស (SDC) បានគាំទ្រដល់ការអនុវត្តកម្មវិធីនេះសម្រាប់ដំណាក់កាលដំបូងទាំង២។ សម្រាប់ដំណាក់កាលចុងក្រោយនេះ SDC និងទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត (Sida) នឹងរួមគ្នាក្នុងការផ្តល់មូលនិធិសម្រាប់ការអនុវត្ត។ ម្ចាស់ជំនួយផ្សេងៗទៀត ដែលបានរួមចំណែកគាំទ្រដល់ការអនុវត្តកម្មវិធីក្នុងដំណាក់កាលទី ២ មានដូចជា៖ IUCN Netherlands, the German Federal Ministry for Economic Cooperation and Development (BMZ), the Belgium development cooperation and Forum Syd។

ផែនទីខេត្តគោលដៅអនុវត្តគម្រោង PaFF ដំណាក់កាលទី ៣ — PaFF អនុវត្តនៅខេត្តចំនួន ៤ ក្នុងប្រទេសកម្ពុជា ខេត្តកំពង់ធំ ព្រះវិហារ ក្រចេះ និងស្ទឹងត្រែង

ហេតុអ្វីត្រូវការ PaFF?

ប្រជាជនកម្ពុជានៅជនបទ ចំនួន ៦៥% កំពុងពឹងផ្អែកលើធនធានធម្មជាតិ ដូចជា ព្រៃឈើ ទន្លេ និងបឹង សម្រាប់ជីវភាពរស់នៅ និងសន្តិសុខស្បៀងរបស់ពួកគេ។ ប៉ុន្តែ ពួកគេភាគច្រើនមានជីវភាពក្រីក្រ មិនសូវមានការធានាចំពោះសិទ្ធិកាន់កាប់ដីធ្លី និង ធនធានព្រៃឈើ ខ្វះខាតសមត្ថភាពផ្នែកបច្ចេកទេស និងហិរញ្ញវត្ថុ ដែលចាំបាច់សម្រាប់ពួកគេក្នុងការគ្រប់គ្រង និងប្រើប្រាស់ធនធានទាំងនេះប្រកបដោយចីរភាព។ ធនធានធម្មជាតិទាំងនោះ បានរងនូវការគំរាមកំហែងពីការប្រើប្រាស់ដោយខុសច្បាប់ និងគ្មានចីរភាព ក៏ដូចជាពីសម្បទានដីសេដ្ឋកិច្ច និងសង្គមកិច្ច វារីអគ្គិសនី ឧស្សាហកម្ម ការកសាងផ្លូវថ្នល់ និងហេដ្ឋារចនាសម្ព័ន្ធផ្សេងៗទៀត។

ក្របខណ្ឌច្បាប់របស់ប្រទេសកម្ពុជា បានផ្តល់នូវដំណោះស្រាយសម្រាប់បញ្ហាទាំងនេះ ដោយអនុញ្ញាតឲ្យសហគមន៍អាចបង្កើត និងគ្រប់គ្រងដោយសេរីលើធនធានព្រៃឈើ ឬជលផល។ អភិក្រមដែលរដ្ឋាភិបាលប្រើប្រាស់សម្រាប់ការផ្តល់សិទ្ធិជូនដល់សហគមន៍មូលដ្ឋានគឺ តាមរយៈ សហគមន៍ព្រៃឈើ សហគមន៍នេសាទ និងសហគមន៍តំបន់ការពារធម្មជាតិ។ អភិក្រមនេះ ស្របទៅនឹងដំណើរការវិមជ្ឈការសិទ្ធិអំណាចពីស្ថាប័នថ្នាក់ជាតិទៅស្ថាប័នថ្នាក់ក្រោមជាតិ។ តាមរយៈការពង្រឹង និងធានាសិទ្ធិជូនសហគមន៍មូលដ្ឋាន ពួកគេអាចមានសក្តានុពលក្នុងការកាត់បន្ថយភាពក្រីក្រ និងការពារធនធានធម្មជាតិ ដែលសហគមន៍ពឹងផ្អែកសម្រាប់ជីវភាពរបស់ពួកគេ។

ប៉ុន្តែ នៅមានសហគមន៍មួយចំនួនប៉ុណ្ណោះ ដែលទទួលបានផលប្រយោជន៍ ពីឳកាសដែលសហគមន៍ព្រៃឈើ សហគមន៍នេសាទ និងសហគមន៍តំបន់ការពារធម្មជាតិ អាចផ្តល់ឲ្យបាន។ នីតិវិធី សម្រាប់ការទទួលស្គាល់អភិក្រមទាំងនេះជាផ្លូវការនៅមានភាពស្មុគស្មាញ ហើយសហគមន៍ភាគច្រើននៅខ្វះខាតចំណេះដឹង ជំនាញ ហិរញ្ញវត្ថុ និងធនធានដទៃទៀត ដើម្បីអាចអនុវត្តទៅតាមអភិក្រមទាំងនោះ។ បញ្ហាប្រឈមដទៃទៀត ក៏កើតឡើងដោយសារតែនៅមានចន្លោះប្រហោង ក្នុងក្របខណ្ឌគោលនយោបាយ ស្ថាប័ន ច្បាប់ និងការត្រួតពិនិត្យ។ ក្នុងនោះ អជ្ញាធរថ្នាក់ក្រោមជាតិ និងអជ្ញាធរមូលដ្ឋាន ក៏នៅមិនទាន់មានសមត្ថភាពពេញលេញក្នុងការបំពេញតួនាទីរបស់ពួកគេរៀងៗខ្លួនផងដែរ។

ប៉ុន្តែ មានសហគមន៍មានមួយចំនួនតូចប៉ុណ្ណោះ ដែលទទួលបានផលប្រយោជន៍ ពីឳកាសក្នុងការទទួលសិទ្ធិគ្រប់គ្រងជាសហគមន៍ព្រៃឈើ សហគមន៍នេសាទ ឬសហគមន៍តំបន់ការពារធម្មជាតិ។ នីតិវិធី សម្រាប់ការទទួលស្គាល់អភិក្រមទាំងនេះជាផ្លូវការនៅមានភាពស្មុគស្មាញ ហើយសហគមន៍ភាគច្រើននៅខ្វះខាតចំណេះដឹង ជំនាញ ហិរញ្ញវត្ថុ និងធនធានដទៃទៀត ដើម្បីអាចអនុវត្តទៅតាមអភិក្រមទាំងនោះ។ បញ្ហាប្រឈមដទៃទៀត ក៏កើតឡើងដោយសារតែនៅមានចន្លោះប្រហោង ក្នុងក្របខណ្ឌគោលនយោបាយ ស្ថាប័ន ច្បាប់ និងការត្រួតពិនិត្យ។ ក្នុងនោះ អជ្ញាធរថ្នាក់ក្រោមជាតិ និងអជ្ញាធរមូលដ្ឋាន ក៏នៅមិនទាន់មានសមត្ថភាពពេញលេញក្នុងការបំពេញតួនាទីរបស់ពួកគេរៀងៗខ្លួនផងដែរ។

PaFF បង្កើតឡើង ដើម្បីជួយដោះស្រាយបញ្ហាទាំងនោះក្នុងប្រទេសកម្ពុជា ដោយផ្តោតលើខេត្តភាគឥសានដែលមានធនធានធម្មជាតិច្រើន ប៉ុន្តែការលូតលាស់ផ្នែកសេដ្ឋកិច្ចទាប។ កម្មវិធី ក៏អនុវត្តស្របទៅតាមកម្មវិធីថ្នាក់ជាតិរបស់ប្រទេសកម្ពុជាសម្រាប់សហគមន៍ព្រៃឈើ សហគមន៍នេសាទ និងសហគមន៍តំបន់ការពារធម្មជាតិ ព្រមទាំងគំនិតផ្តួចផ្តើមកំណើនបៃតងនៃចីរភាពថវិកាសម្រាប់ការអភិរក្ស និងគោលដៅក្នុងការស្តារគម្របព្រៃឈើឲ្យបាន៦០% នៃផ្ទៃប្រទេស ត្រឹមឆ្នាំ២០៣០ ផងដែរ។

អង្គការ ៤ រួមគ្នាអនុវត្តកម្មវិធី

អង្គការចំនួន៤ រួមគ្នាអនុវត្តកម្មវិធី PaFF រួមមាន៖ រីខូហ្វ (RECOFTC) អង្គការកម្មវិធីផ្លាស់ប្តូរ បទពិសោធន៍អនុផលព្រៃឈើនៅអាស៊ី (NTFP-EP) មូលនិធិសកលដើម្បីអភិរក្សធនធានធម្មជាតិ (WWF) និងសមាគមថែរក្សាបរិស្ថាន និងវប្បធម៌ (CEPA)។

PaFF រួមបញ្ចូលជំនាញផ្សេងៗគ្នា របស់អង្គការដៃគូ៖ WWF លើកិច្ចសហការជាមួយភាគីពាក់ព័ន្ធ និងវេទិកាគោលនយោបាយនានាក្នុងតំបន់ទេសភាព, NTFP-EP លើការអភិវឌ្ឍជីវភាពរស់នៅ រីខូហ្វ (RECOFTC) និង CEPA លើការពង្រឹងសហគមន៍ ដែលគ្រប់គ្រងធនធានធម្មជាតិ។ ការប្រើប្រាស់អភិក្រមនៃកិច្ចសហការក្នុងតំបន់ទេសភាព បានបង្កើតឲ្យមានការបង្រួបបង្រួម ពង្រឹងការផ្សព្វផ្សាយ និងការផ្សាភ្ជាប់ទៅនឹងវេទិកាថ្នាក់ជាតិ និងថ្នាក់ខេត្ត។

អង្គការទាំង ៤ ទទួលបានការប្រឹក្សាយោបល់ ពីគណៈកម្មការប្រឹក្សាយោបល់កម្មវិធី និងដឹកនាំដោយគណៈកម្មការគ្រប់គ្រង ក្នុងនោះគណៈកម្មាការប្រឹក្សាយោបល់ក៏មានតំណាងពីរាជរដ្ឋាភិបាល។

PaFF ចាប់ផ្តើមពីខែ វិច្ឆិកា ឆ្នាំ២០១៤ និងបញ្ចប់នៅខែមិថុនា ឆ្នាំ២០២៣

កម្មវិធីចែកជាបី ដំណាក់កាល៖

NTFP-EP ដឹកនាំដំណាក់កាលទី ១ ពីខែវិច្ឆិកា ឆ្នាំ២០១៤ ដល់ខែមិថុនា ឆ្នាំ២០១៧
WWF កម្ពុជា ដឹកនាំដំណាក់កាលទី២ ពីខែកក្កដា ឆ្នាំ២០១៧ ដល់ខែមិថុនា ឆ្នាំ២០២១
RECOFTC កម្ពុជា ដឹកនាំដំណាក់កាលទី ៣ ពីខែកក្កដា ឆ្នាំ២០២១ ដល់ខែមិថុនា ឆ្នាំ២០២៣

តើ PaFF ទទួលបានជោគជ័យអ្វីខ្លះក្នុងដំណាក់កាលទី ១ និងទី២?

PaFF ដំណាក់កាលទី ១ និងទី២ ជោគជ័យក្នុងការគាំទ្រសហគមន៍ព្រៃឈើ សហគមន៍នេសាទ និងបណ្តាញរបស់ពួកគេក្នុងខេត្តក្រចេះ ស្ទឹងត្រែង ព្រះវិហារ និងកំពង់ធំ រួមមាន៖

និយ័តកម្មសហគមន៍ព្រៃឈើ និងសហគមន៍នេសាទចំនួន ៦០
អភិវឌ្ឍ និងអនុវត្តផែនការគ្រប់គ្រងរបស់សហគមន៍ព្រៃឈើ និងសហគមន៍នេសាទចំនួន ១៣៤
បង្កើត និងដំណើរការសហគ្រាសសហគមន៍ចំនួន ៣៥
បង្កើត និងដំណើរការឥណទានសហគមន៍ចំនួន ៣៦ ដែលមានទុនសរុបចំនួន ៨៨.០០០ដុល្លារអាមេរិច និងមានសមាជិកចំនួន ១.២០៦
បង្កើត និងដំណើរការឥណទានសហគមន៍នេសាទចំនួន ១០ ដែលមានទុនសរុបចំនួន ៤.៨៧៨ ដុល្លារអាមេរិច និងមានសមាជិកចំនួន ១៩១នាក់
បង្កើត និងដំណើរការបរធនខ្នាតតូច ចំនួន ១៤ សម្រាប់សហគមន៍ព្រៃឈើ និងនេសាទសម្រាប់ជីវភាពសហគមន៍

កម្មវិធីនេះបានជួយកសាងសមត្ថភាពរបស់អាជ្ញាធរខេត្ត ក្នុងការធ្វើផែនការតំបន់ទេសភាព ការគ្រប់គ្រង និងការផ្តល់ហិរញ្ញប្បទាន។ កម្មវិធីក៏លើកកម្ពស់ការចូលរួមរបស់សហគមន៍ព្រៃឈើ និងសហគមន៍នេសាទ ក៏ដូចជាបណ្តាញរបស់ពួកគេ ទៅក្នុងវេទិកាពហុភាគី។ វេទិកាទាំងនោះរួមមាន គណៈកម្មាការសម្របសម្រួលសហគមន៍ព្រៃឈើថ្នាក់ជាតិ និងខេត្ត ក្រុមការងារបច្ចេកទេសកំណែទម្រង់វិស័យព្រៃឈើ និងក្រុមការងារបច្ចេកទេសកំណែទម្រង់វិស័យជលផល។

ក្រុមការងារបច្ចេកទេស ចូលរួមក្នុងដំណើរការនៃការធ្វើសេចក្តីសម្រេចចិត្តសំខាន់ៗ និងផ្តល់យោបល់សម្រាប់សិទ្ធិ និងទទួលបានផលប្រយោជន៍កាន់តែប្រសើរ ពីធនធានធម្មជាតិ សម្រាប់សហគមន៍មូលដ្ឋាន ដូចជាការធ្វើពាណិជ្ជកម្មលើធនធានរបស់ពួកគេ។

តើ PaFF រំពឹងថានឹងជោគជ័យអ្វីខ្លះទៀតក្នុងដំណាក់កាលទី៣

PaFF ដំណាក់កាលទី ៣ អនុវត្តការងារ ដើម្បីធ្វើឲ្យប្រាកដថា សហគមន៍អាចអនុវត្តសិទ្ធិរបស់ពួកគេក្នុងការគ្រប់គ្រង ការពារ និង ទទួលបានប្រយោជន៍ពីធនធានធម្មជាតិនៅមូលដ្ឋានរបស់ពួកគេ ដើម្បី ទ្រទ្រង់ជីវភាពរស់នៅ កាត់បន្ថយភាពក្រីក្រ និងបង្កើនភាពធន់នឹងវិបត្តិផ្នែកសេដ្ឋកិច្ច និងបរិស្ថាន។

ដំណាក់កាលចុងក្រោយនេះ ក៏ព្យាយាមពង្រឹងដំណើរការប្រជាធិបតេយ្យ លើកកម្ពស់នីតិរដ្ឋ និងការពារសិទ្ធិស្រ្តី ក្រុមជនជាតិដើមភាគតិច និងសមាជិកសហគមន៍ដែលមានប្រាក់ចំណូលទាបតាមរយៈការចូលរួមរបស់ពួកគេនៅក្នុងការគ្រប់គ្រងធនធានធម្មជាតិនៅតាមសហគមន៍។

តើ PaFF នឹងធ្វើអ្វីខ្លះក្នុងដំណាក់កាលទី៣?

PaFF ៣ នឹងពង្រឹងបន្ថែមទៅលើភាពជោគជ័យពីដំណាក់កាលមុន ដើម្បីពង្រីកឧត្តមានុវត្តន៍របស់គម្រោង ដោយបង្កើនចំនួនសហគមន៍ព្រៃឈើដែលចូលរួមក្នុងគម្រោង ក៏ដូចជាពង្រីកទៅអនុវត្តការងារជាមួយនឹងសហគមន៍តំបន់ការពារធម្មជាតិ។ PaFF នៅតែបន្តផ្តល់វគ្គបណ្តុះបណ្តាលដល់មន្រ្តីរដ្ឋាភិបាលថ្នាក់ខេត្ត អជ្ញាធរមូលដ្ឋាន និងសមាជិកសហគមន៍ព្រៃឈើ សហគមន៍នេសាទ និងសហគមន៍តំបន់ការពារធម្មជាតិ។

PaFF ៣ នៅតែបន្តជួយដល់សហគមន៍ក្នុងការការពារ អនុវត្ត និងរក្សាសិទ្ធិរបស់ពួកគេលើធនធានធម្មជាតិតាមរយៈការទទួលបានសិទ្ធិស្របច្បាប់លើដីធ្លី។ គម្រោងក៏នឹងគាំទ្រសហគមន៍ក្នុងការរៀបចំ និងអនុវត្តផែនការគ្រប់គ្រងធនធានធម្មជាតិរបស់ពួកគេប្រកបដោយចីរភាព បរិយាប័ន និងមានការចូលរួម។ PaFF នឹងកសាងសមត្ថភាពសហគមន៍ ក្នុងការបង្កើតថ្នាលបណ្តុះកូនឈើ ការដាំឈើ សុវុឌ្ឍិកម្មព្រៃឈើ ការជម្រុញដំណុះធម្មជាតិ ការសម្អាតផ្លូវភ្លើង ការអនុវត្តផែនការគ្រប់គ្រងផ្សេងទៀត ការធ្វើផែនការហិរញ្ញវត្ថុ ការគ្រប់គ្រងជម្លោះ និងការតាមដាន និងវាយតម្លៃដោយមានការចូលរួម។

កម្មវិធីក៏នឹងកំណត់វិធីសាស្រ្តសម្រាប់សហគមន៍ ក្នុងការបង្កើតជម្រើសមុខរបរផ្សេងទៀត ដើម្បីពង្រឹងដល់ការស៊ាំទៅនឹងវិបត្តិផ្សេងៗ។ ក្នុងដំណាក់កាលទី៣ នេះ គម្រោងក៏នឹងគាំទ្រសហគ្រាសសហគមន៍តាមរយៈបង្កើតឳកាសវិនិយោគ ធ្វើឲ្យប្រសើរនូវផែនការពាណិជ្ជកម្ម និងការផ្សាភ្ជាប់អ្នកផលិតទៅនឹងទីផ្សារ។

PaFF ក៏នឹងបន្តបង្កើតយន្តការហិរញ្ញប្បទានប្រកបដោយនិរន្តរភាព ដើម្បីឲ្យសហគមន៍អាចអនុវត្តផែនការគ្រប់គ្រងរបស់ពួកគេបាន និងទទួលបានប្រយោជន៍កាន់តែប្រសើរក្នុងការចូលរួមជាមួយសហគមន៍។ ក្នុងដំណាក់កាលទី ៣ នេះ កម្មវិធីនឹងបង្កើតគម្រោងឥណទានសហគមន៍ព្រៃឈើចំនួន ១៤០ ដែលមានទុនសរុបចំនួន ៣៩២.០០០ ដុល្លារអាមេរិក និងមានសមាជិកចំនួន ១៧.០០០ គ្រួសារមានសិទ្ធិខ្ចីប្រាក់ ដែលរំពឹងថានឹងអាចវិភាជថវិការសម្រាប់គ្រងគ្រងសហគមន៍ចំនួន ២.៩៤០ ដុល្លារអាមេរិក ក្នុងមួយខែ ។ កម្មវិធី ក៏នឹងបង្កើតបរធនខ្នាតតូចចំនួន ៧៦ ដែលមានទឹកប្រាក់សរុបចំនួន ៣៨០.០០០ ដុល្លារអាមេរិក។ កម្មវិធីនឹងបន្តគាំទ្រសហគ្រាសនៅតាមសហគមន៍ តាមរយៈកាផ្តល់ឱកាសវិនិយោគ ការធ្វើផែនការអាជីវកម្មដែលមានភាពល្អប្រសើរជាងមុន និងការភ្ជាប់ទំនាក់ទំនងរវាងផលិតករ និងទីផ្សារ។ សកម្មភាពទាំងនេះ ព្រមទាំងសកម្មភាពបង្កើតប្រាក់ចំណូលដទៃទៀត ដូចជា កសិរុក្ខកម្ម ឬចំការឈើដាំ គឺជាវិភាគទានដ៏សំខាន់ដែលបង្កលក្ខណៈឲ្យសហគមន៍អាចការពារ និងអនុវត្តផែនការគ្រប់គ្រងធនធានធម្មជាតិរបស់ពួកគេប្រកបដោយចីរភាព។

PaFF ក៏នឹងពង្រឹងបន្ថែមនូវគោលនយោបាយ និងក្របខណ្ឌច្បាប់ ដើម្បីការផ្តល់បរិយាប័ន្ន សមធម៌ និងប្រយោជន៍ចំពោះសហគមន៍នៅមូលដ្ឋាន ក្នុងការចូលរួមគ្រប់គ្រងធនធានធម្មជាតិកាន់តែប្រសើរ។ ចំណុចនេះនឹងរួមបញ្ចូលមានការស្រាវជ្រាវ និងការវិភាគអំពីគោលនយោបាយ ដើម្បីជាមូលដ្ឋានព័ត៌មានសម្រាប់ការកែសម្រួលច្បាប់ គោលនយោបាយ និងនីតិវិធីរដ្ឋបាល ដែលរួមចំណែកដល់ការគ្រប់គ្រងធនធានធម្មជាតិ យន្តការផ្តល់ហិរញ្ញប្បទានប្រកបដោយចីរភាព និងប្រសិទ្ធភាពផ្នែកសេដ្ឋកិច្ច។

PaFF ក៏នឹងពង្រឹង និងគាំទ្របណ្តាញសហគមន៍ព្រៃឈើ សហគមន៍នេសាទ និងសហគមន៍តំបន់ការពារធម្មជាតិ និងបង្កើនសិទ្ធិរបស់ពួកគេ ដោយផ្តោតជាពិសេសលើជនជាតិដើមភាគតិច និងស្រ្តី ដើម្បីឲ្យពួកគេចូលលរួមយ៉ាងសកម្ម ក្នុងវេទិកាពហុភាគី ដូចនេះ ពួកគេអាចស្វែងរកការគាំទ្រ ដើម្បីបង្កើតបរិយាកាសគោលនយោបាយ និងនិរន្តរភាពហិរញ្ញវត្ថុ។

ដំណាក់កាលទី ៣ នេះ ក៏នឹងបង្កើតការវិភាគស៊ីជម្រៅវិសមភាពយេនឌ័រ និងសង្គម។ ការវិភាគនេះ នឹងជួយគម្រោងស្វែងយល់ពីតុល្យភាពអំណាច និងរៀបចំយុទ្ធសាស្រ្ត ដើម្បីទទួលបានបរិយាប័ន និងមានការចូលរួមពីអ្នកពាក់ព័ន្ធ ដែលធ្វើការលើការគ្រប់គ្រងធនធានធម្មជាតិដោយសហគមន៍។

PaFF ៣ ក៏នឹងបង្កើនការតាមដានលទ្ធផល ដំណើរការ និងឥទ្ធិពលរបស់គម្រោងទាំងមូល។ គម្រោងនឹង កំណត់កត្តាដែលធ្វើឲ្យមានការជោគជ័យ ក៏ដូចជាផ្តល់នូវមេរៀនក្នុងការគាំទ្រដល់ការគ្រប់គ្រងសហគមន៍ ផ្សេងទៀតដែលមិនស្ថិតក្នុងគោលដៅរបស់គម្រោង និងក្រោយពេលគម្រោងបានបញ្ចប់។

គោលដៅរបស់ PaFF ៣

គោលដៅសម្រាប់ដំណាក់កាលទី៣ រួមមាន

សហគមន៍ព្រៃឈើ៖ PaFF នឹងគាំទ្រសហគមន៍ចំនួន ១១៣ ក្នុងការធ្វើនិយ័តកម្ម រៀបចំ និងអនុវត្តផែនការគ្រប់គ្រងសហគមន៍ព្រៃឈើ ដែលរួមមានកសិរុក្ខកម្ម ការដាំស្តារព្រៃឈើ និងការប្រមូលផល។ ដើម្បីផ្តល់ ហិរញ្ញប្បទានមួយដែលមាននិរន្តរភាពសម្រាប់ការគ្រប់គ្រងសហគមន៍ PaFF នឹងគាំទ្រឲ្យមានឥណទានសហគមន៍ព្រៃឈើចំនួប ១១១ ក្នុងនោះ ៧៥បង្កើតថ្មី និង៣៦ បន្តមកពីដំណាក់កាលមុន។ គម្រោងក៏នឹងគាំទ្ររៀបចំបរធនខ្នាតតូចនៅសហគមន៍ព្រៃឈើចំនួន ៥៦ ដែល៥៣បង្កើតថ្មី និង៣បន្តពីដំណាក់កាលមុន។
សហគមន៍នេសាទ៖ PaFF នឹងគាំទ្រសហគមន៍នេសាទចំនួន ២៤ ក្នុងខេត្តស្ទឹងត្រែង ដើម្បីរៀបចំ និងអនុវត្តផែនការគ្រប់គ្រង។ PaFF ក៏នឹងផ្តល់ទុន និងដំណើរការឥណទានសហគមន៍នេសាទទាំង ២៤ ដែលក្នុងនោះ ១១បង្កើតថ្មី និង ១៣បន្តពីដំណាក់កាលមុន។ គម្រោងក៏នឹងផ្តល់ទុន និងដំណើរការបរធនខ្នាតតូចរបស់សហគមន៍នេសាទចំនួន ២០ ក្នុងនោះ៩បង្កើតថ្មី និង១១បន្តពីដំណាក់កាលមុន។
សហគមន៍តំបន់ការពារធម្មជាតិ៖ PaFF នឹងចម្លងគម្រូយន្តការហិរញ្ញប្បទានដោយសហគមន៍ព្រៃឈើដោយខ្លួនឯង នៅដំណាក់កាលមុនៗ ដោយបង្កើត និងដំណើរការឥណទានសហគមន៍នៅសហគមន៍តំបន់ការពារធម្មជាតិចំនួន ៥ ដើម្បីរួមចំណែកក្នុងការអនុវត្តផែនការគ្រប់គ្រងរបស់ពួកគេ។
សហគ្រាសសហគមន៍៖ PaFF នឹងបន្តធ្វើការងារជាមួយសហគ្រាសចំនួន ១១ ដែលបង្កើតនៅដំណាក់កាលទី ២ ដើម្បីប្រមូលនូវគម្រូល្អៗ សម្រាប់ជាប្រភពហិរញ្ញវត្ថុក្នុងការអនុវត្តផែនការគ្រប់គ្រង និងបង្កើនជីវភាពរបស់សមាជិកសហគមន៍។
ការពង្រឹងបណ្តាញ៖ PaFF ដំណាក់កាលទី៣ នឹងពង្រឹងបណ្តាញសហគមន៍ព្រៃឈើក្នុងខេត្តទាំង ៤ បណ្តាញសហគមន៍នេសាទចំនួន ១២ ដោយ២ នៅថ្នាក់ខេត្ត និង១០ នៅថ្នាក់ស្រុក និងបណ្តាញសហគមន៍តំបន់ការពារធម្មជាតិ ថ្នាក់តំបន់ និងថ្នាក់មូលដ្ឋាន។ គម្រោង នឹងបង្កើត និងសម្របសម្រួលបណ្តាញស្រ្តីដែលជាសមាជិកសហគមន៍ព្រៃឈើ ដើម្បីពួកគេអាចសិក្សាពីគ្នា និងគាំទ្រគ្នាទៅវិញទៅមក។
ការភ្ជាប់ទំនាក់ទំនង និងការស្វែងរកការគាំទ្រ៖ PaFF នឹងបន្តសម្របសម្រូលគណៈកម្មាការសម្របសម្រួលសហគមន៍ព្រៃឈើថ្នាក់ខេត្ត ក្នុងខេត្តគោលដៅទាំង ៤។ គណៈកម្មាការនេះប្រមូលផ្តុំតំណាងពីបណ្តាញសហគមន៍ព្រៃឈើ អជ្ញាធរមូលដ្ឋាន និងមន្រ្តីរដ្ឋបាលព្រៃឈើថ្នាក់ក្រោមជាតិ។ PaFF នឹងគាំទ្រសហគមន៍ព្រៃឈើ និងបណ្តាញរបស់ពួកគេ ក្នុងការចូលរួមការពិភាក្សាផ្នែកគោលនយោបាយដោយពឹងផ្អែកលើភស្តុតាង ដើម្បីបង្ហាញថាហិរញ្ញប្បទានសម្រាប់សហគមន៍ព្រៃឈើដោយចីរភាព និងការគាំទ្រដល់ការអភិវឌ្ឍន៍សហគមន៍ គឺជាដំណោះស្រាយសម្រាប់ការប្រែប្រួលអាកាសធាតុ។ ការផ្តួចផ្តើម ក៏នឹងអនុវត្តរួមគ្នាជាមួយនឹងនាយកដ្ឋានពាក់ព័ន្ធ នៅថ្នាក់ជាតិ និងថ្នាក់ក្រោមជាតិ ដើម្បីបង្កើតកិច្ចសហការ និងការចូលរួមពីអ្នកពាក់ព័ន្ធក្នុងវិស័យនេះ និងអ្នកពាក់ព័ន្ធផ្សេងទៀតដែលនឹងជួយគាំទ្រដល់សហគមន៍នៅពេល PaFF ដំណាក់កាលទី៣ បញ្ចប់។

ក្រុមគោលដៅដែល PaFF នឹងអនុវត្តការងាររួមជាមួយក្នុងដំណាក់កាលទី៣

នៅថ្នាក់ក្រោមជាតិ និងនៅថ្នាក់ជាតិ

សហគមន៍ព្រៃឈើ៖ គណៈកម្មាការសហគមន៍ សមាជិក ក្រុមឥណទាន ក្រុមសហ្រគាស
សហគមន៍នេសាទ៖គណៈកម្មាការសហគមន៍ សមាជិក ក្រុមឥណទាន ក្រុមសហ្រគាស
សហគមន៍តំបន់ការពារធម្មជាតិ៖ គណៈកម្មាការសហគមន៍ សមាជិក ក្រុមឥណទាន ក្រុមសហ្រគាស
បណ្តាញសហគមន៍ព្រៃឈើ ថ្នាក់ឃុំ ថ្នាក់ស្រុក និងថ្នាក់ខេត្ត
បណ្តាញសហគមន៍នេសាទ ថ្នាក់ស្រុក និងថ្នាក់ខេត្ត
បណ្តាញសហគមន៍តំបន់ការពារធម្មជាតិ ថ្នាក់មូលដ្ឋាន និងថ្នាក់តំបន់
គណៈកម្មាការស្រមបសម្រួលកម្មវិធីសហគមន៍ព្រៃឈីថ្នាក់ខេត្ត
គណៈកម្មាការសម្របសម្រួលកម្មវិធីសហគមន៍ព្រៃឈីថ្នាក់ជាតិ
សម្ព័ន្ធសហគមន៍តំបន់ការពារធម្មជាតិថ្នាក់ជាតិ
មន្ទីរកសិកម្ម រុក្ខាប្រមាញ់ និងនេសាទ ក្នុងខេត្តកំពង់ធំ ព្រះវិហារ ក្រចេះ និងស្ទឹងត្រែង
មន្ទីរបរិស្ថាន ក្នុងខេត្តកំពង់ធំ ព្រះវិហារ ក្រចេះ និងស្ទឹងត្រែង
នាយកដ្ឋានព្រៃឈើ និងសហគមន៍ព្រៃឈើ នៃរដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និង នេសាទ
នាយកដ្ឋានអភិវឌ្ឍសហគមន៍នេសាទ នៃរដ្ឋបាលជលផល នៃក្រសួងកសិកម្ម រុក្ខាប្រមាញ់ និង នេសាទ
នាយកដ្ឋានជីវភាពសហគមន៍ នៃអគ្គនាយកដ្ឋានសហគមន៍មូលដ្ឋាន នៃក្រសួងបរិស្ថាន
ក្រុមការងារបច្ចេកទេសកំណែទម្រង់វិស័យព្រៃឈើ និងអនុក្រុមការងារដែលពាក់ព័ន្ធ
ក្រុមការងារបច្ចេកទេសស្រមាប់វិស័យជលផល
ក្រុមការងារបច្ចេកទេសយេនឌ័រនៃក្រសួងបរិស្ថាន
ក្រុមការងារបច្ចេកទេសយេនឌ័រនៃរដ្ឋបាលព្រៃឈើ